Həbib Füzuli oğlu Abdullayev 1983-ci il noyabr ayının 14-də Bakı şəhəri köhnə "Dağlı məhəlləsi", müəllim ailəsində dünyaya gəlmişdir. 2000-ci ildə orta məktəbi bitirmiş, 2000 - 2001-ci illərdə Qərb Universitetində təhsil almışdır.

Azərbaycanda olan bəzi siyasi səbəblər ucbatından ailəsinə görə vətəni tərk etmək məcburiyyətində qalmış və Almaniyanın Berlin şəhərinə iltica etmişdir. Hal-hazırda Berlində mühacir həyatı sürməkdədir.

Kiçik yaşlarından şerlər yazır. Şeriyyat aləminə addımlamasında mühitindəki şairlərin də rolu olmamış deyildir. Klassik dahi şairlərdən və dövrünün "Sabiri" kimi tanınan rəhmətlik Hacı Baba Pünhandan, Nizami Rəmzidən və hal-hazırda özünə ustad saydığı Məşədi Əbdül Fəqirdən qidalanmaqdadır.

Ləqəbi "Müntəzir", yəni intizarda olan, gözləyən deməkdir. Mənası haqq-ədalət, xoşbəxt günün gələcəyini gözləmək, zamanın Sahibinin intizarında olmaq.
Mətbu olaraq ilk dəfə "Hürriyyət" qəzetində Müntəzir imzası ilə çıxış etmişdir. Internetdə rezonans doğurmuş www.elsever.biz elektron jurnalının qurucularından biridir, bundan başqa www.pur.gen.az , www.azerilife.com , www.mirzexezerinsesi.com , www.izedebiyat.com, www.amatorceedebiyat.com, www.turkedebiyati.org saytlarında yazıları dərc olunub və hal hazırda olunmaqdadır. Azərbaycanda çıxan "Alatoran" jurnalında da yazıları işıq üzü görür.

Daha çox qəzəl, bəhri-təvil, janrlarında yazmağa, şerin yeni-yeni imkanlarını sınamağa meyllidir. Əsasən də Azərbaycan ədəbiyyatında yeni bir janr - "Təkrir" şerinin təməlini qoymuşdur.
Şerləri əsasən siyasi-satirik, dini və ictimai mövzulardadır. Həyatın acı da olsa həqiqətlərini, çirkinliklərini, eybəcərliklərini göstərməyə çalışır.
"Yaxşısı bizimdir, pislə mübarizə aparaq" prizmasıyla çıxış edən yazar, haqqı deməyin zamana, məkana, şəraitə dəxli olmadığını vurğulayır.